قصيـــــدة بشرى ( قصيــدة البنـــــت الحزينة)

يا الي سألتوا واش سبابي **** علاش راني ليوم انقاسي
علاش لحقت في عز شبابي **** هكذا نهلك فنفسي بنفسي
رايحة اليوم نفرغ قلبي **** ونجاوب كل من راه يسقسي

ونشا الله لما تسمعوا جوابي **** تفهموني وتقدّروا احساسي
هذا شحال وانا نخبي **** او منسية في عالم منسي
رافدة سري داخل قلبي **** وحتى واحد ما سمع حسي

قاعدة وحدي وغالقة بابي **** او معتاكفة على المعاصي
مرة نجبد مرة نسربي **** وقلت هذا هو الي ينّسي
او ما زادلي غير عذابي **** هم وحد آخر زدتو لراسي

لتمّ لقيت روحي نحبي **** لقبري ونحفر بيه بفاسي
وليت انشوف كل شي سلبي **** ولات نفسي فيا توصي
وتقولي لوكان غير تهربي **** للزنقة بلاك رايحة تتونسي

وتلقاي كامل واش تحبي **** شراب او مال او كل ما تحوسي
خير ما تبقاي وحدك تتعذبي **** اخرجي للزنقة شويا تتنفسي
قلت في نفسي ماعليش جربي **** وحاولي على قلبك اعفسي

خرجت وعفست على قلبي **** ولقيت الزنقة عالم قاسي
عالم زادلي غير عذابي **** زاد كملي على نصي
لتم بديت ندير في حسابي **** ونفكر باش نقتل نفسي

لما لحقت ساعة غيابي **** وجدّت روحي وقطعت ياسي
قلت خلاص نريّح قلبي **** في هاذ الدنيا وش راني نواسي
فذيك الدقيقة بعتلي ربي **** صوت ملبعيد قالي ...حبّسي

ما لازمش عليك تهربي **** لازم تكملي وما تيأسي
عيشي على جال من تحبي **** قلتلو سبابي هوما ناسي
ضيعوني في عز شبابي **** حطموني وريبولي ساسي

حتى خويا الي من صلبي **** حطلي السم داخل كاسي
خدعني يا خويا في غيابي **** وادالي اعز حاجة في نفسي
كنت بكري ندير فحسابي **** مع عدياني كيفاش نواسي

وجاتني الضربة غير مجنابي **** من عند اهلي من عند ناسي
سمطولي ماكلتي وشرابي **** وحرموني حتى من نعاسي
ودعيت ربي يحميني من حبابي **** أما عدياني...ندبر راسي

قالي اصبري واش تحبي **** وبدى يفكر فيا ويوّصي
ما تقنطيش من رحمة ربي **** مادام مازالك حية وتتنفسي
وفهاذ الدنيا لوكان تحسبي **** شخال من واحد راه يقاسي

تلقاي روحك جابلي ربي **** خير من الناس لوكان تحوسي
وعوض تهربي تولّي تقربي **** من الي راكي غير فيه تعصي
صلّي زوج ركعات او توبي **** تشوفي لتمّا واش تحسي

والمخدرات لوكان تحّبي **** ديري في بالك تقدري تحبسي
لوكان تتوكلي على ربي **** ومن دركا تبداي تنقصي
لتم رحت وفتحت كتابي **** وقريت حتى لاّية الكرسي

وعرفت بلي سبحانو ربي **** ماهو راقد ماهو ناسي
وحدو العالم بلّي مخببي **** ومنين يجيني الخير ما نحصي
كمّلت قريت وختنت كتابي **** بقّل اعوذ برب الناس

رفدت يدي ودعيت ربي **** وقلتلو سبابي هوما ناسي
ضيعونني في عز شبابي **** والنص الثاني ضيعتو بنفسي
يا ربي كون بقربي **** واهدي هاذ القلب العاصي

واغفرلي كل ذنوبي **** واعفيني من المعاصي
ربي سبحانو ردّلي جوابي **** ردني للطريق وجابلي نصي
انسان صارحتو ودقدق في بابي **** وراكم معروضين قريب عرسي

[ندعوك للتسجيل في المنتدى أو التعريف بنفسك لمعاينة هذه الصورة]
هادي قصة حقيقة حدثت لبنت
كتبت على شكل قصيدة
و هادي من الحوادث التى تحدث في مجتمعنا
[ندعوك للتسجيل في المنتدى أو التعريف بنفسك لمعاينة هذه الصورة]