كلــــــــــــــــــــــــمة لحبــــــــــــــــــــــاب (ويـــــــــــــــنهم لـــــــــــــــــــــحباب؟؟)

انتيا يا اللي سألتني على كلمة لحباب *** معدناش نقراوها في المسيد واش من سبة
قوتلي وعلاش عدنا نقراو غير على لحساب *** سمعت بلي بكري كانو يقراو على الصحبة
راني حاب نعرف محلها من الاعراب *** المشكل في الفعل و لا الفاعل اللي تخبى
اذا كان الفعل منصوب الفاعل نصاب *** و الله هاد لقرايا مفهمت فيها حبة

علاش اليوم لحبيب عاد ما ينصاب *** و كرهنا بعضنا علاش يا عجبا
و لا الصحبة حبست في عصر بن الخطاب *** أبو بكر الصديق، علي و الصحابة
اليوم عدنا نقراوعلى النجوم و السحاب *** بصاح منقراوش على بنآدم كيفاش يتربى
لا خويا وسيــم احكيلي على لحباب***معدناش نقروها في المسيد واش من سبة

اذا قتلك نعرف نتسمى كذاب *** على خاطر كاين ميات نسبة و سبة
بصاح رايح نحاول نردلك جواب *** هاد لجواب انا خذيتو من واحد التجربة
كنت عايش في وقت شباب *** رزقني ربي بالواحد الحاجة شابة
نعاون الناس في الوقات الصعاب *** كان اللي يقصدني نقولو مرحبا

في و جهم عمري ولا نغلق الباب *** و لتم بذات بدات الصحبة
الناس تحبني و كثرو لحباب *** صباح و عشية معاهم في رحبة
نعيا نحسب يتلفلي لحساب *** من وين طاحة عليا كامل هاد لمحبة
وين ما نروح نصيبهم قراب***و الله غير حتى ساعات وليت نتخبى

ندخل لبيتي و نغلق الباب *** و قلت انا هو سلطان الغابة
حسيت كلي براسي راني شايد السحاب*** خفت لكان نموت و يعملولي قبة
واحد النهار هكا و بلا سباب *** معرفتش من وين جاتني ذيك الضربة
تنقطع الرزق و تنغلق الباب *** حمدت ربي و رضيت بالكاتبة
و بدات الدنيا عليا تصعاب *** و بدا الزمان ادور هالي غربة

و بداو اسقسوا عليا الصحاب *** مراكش تبان واش هاد الغيبة
قوتلهم يا ولدي المومن مصاب *** الدنيا مرة ساهلة و مرات صعيبة
و الرزق حاجة محطوطة في كتاب *** ساعات تبان و ساعات تتخبى
كيف هاديك الشمس اللي مغطيتها السحاب *** تعاود تبان مهما طالة الغيبة

المهم دوكا البركة في الصحاب ***الي كانو صبوني في الاوقات الصعيبة
نروح ليهم نقصدهم للباب *** يوقفو معايا في الاوقات الصعيبة
بصاح هاد المرة راهم طولو لغياب *** محوسوش عليا يا درى واش من سبة
معليش نروح نسبب لسباب *** على الاقل نسمع منهم كلمة شابة

انسوني شوية من هاد لعذاب *** راني غير وحدي عايش في غربة
اللي نروح ليه نقصدو للباب *** إما مكانوش إما اصيبلي سبة
وبديت نشوف بلي كثرو لسباب *** لتما عرفت بلي راهو عليا يتخبى
عرفت بلي راني غالط في الحساب *** و بلي ماشي انا هو سلطان الغابة

و لا انا هو ودوك راسي شاب *** السبع كي يكبر إداورو عليه الديوبة
لتم اعرفت بلي ولاو الصحاب *** لهاداك الي دا مكاني في هديك الحاجة الشابة
لتم فهمت و عرفت الصواب *** و عرفت و قتاش تزيد الصحبة
الصحبة عمرها ولا تزيد في الاوقات الشابة*** تزيد في لوقات و الظروف الصعبة

بديت نفكر واش من سباب *** باش ولاو الناس هكذا على ضربة
علاش عاد الصاحب اليوم ما ينصاب***و كرهنا بعضنا علاش يا عجبا
شفت ولد صغير رافد كتاب *** رافد كتابات رافد مكتبة
خارج من المسيد لحق للباب *** مفهمش من وين جاتو ذيك الضربة

طاح في الارض و تفتح لكتاب *** و كانت في داخلو صفحة مكتوبة
الساكسوني روبـــــــن الحطاب *** هو و جماعتو فرسان الغابة
و افانوي كانـــــو صحـــاب **** قطع طرق شكلو عصابة
زاد جا طفل صغير سرقلو الكرطاب*** ر فدو و داه و راح تخبى

عرفت بلي اليوم قراو درس شباب *** اللصوص الاربعين وعلي بابا
بن آدم خلقو ربي و عطالو قلب شباب*** اعطالو قلب مليح يعرف لمحبة
كل ما حب الناس في عوض المحبة صاب ***راح عالم لقلوب و دخل عالم لحساب
دخل عالم لحيلة ولخدع يا عجابا *** الحيلة و لخدع الحقيقة راهم قراب
و الحق و المحبة لقاو رواحهم في غربة *** و الزمان راهو يمشي راهو ازيد يصعاب
يا ويلو اللي نيـــــــــــــة غير اروح يتخبى***يدخل داخل حفرة ويتغطى بالتراب و يكتب في قبرو

جبـــــــــــــدت روحي من اللعبــــــــة... جبدت روحي من اللعبة